6. ad inquietum fabrum

Cyclopum Liparis memoratur habere tabernas,

      Quos labor exercet nocte dieque gravis;

Sic tamen ut capiant partem somnique cibique,

      Et recreet fessas tantula pausa manus.

5

Te, fugiende faber, nec opus, nec flamma fatigat,

      Quominus incudem fervida massa premat.

Nulla tibi requies, nullam vicinia sentit,

      Cum tuus infestet proxima quaeque labor.

Communis paries utinam par Alpibus esset,

10

      Aut fieret fornax ignibus Aetna tuis!

Non reor humana qui sis de stirpe creatus,

      Insopor ac potuit te genuisse draco.

Tu tamen ad ferrum, cum sis demissus ab auro,

      Peiori studio degener invigilas.

15

Aurea pompa patrem, te ferrea massa retentat.

      Huic oculos somnus, mors premat atra tuos.