1.

O deus omnipotens, convexae conditor arcis,

Terrarum et maris et quae tantus continet orbis,

Suscipe vota tuae plebis, dignare rogatus

Caesaris eximii Karoli firmare salutem;

5

Multiplices vitam protendens, rector, in annos,

Imperio oceanum consignans ordine metam,

Hostibus oppressis firmata pace perenni,

Optime quod princeps sedatum rite gubernet,

Permulcente sua divino munere dextra.

10

Vnus in aetherea altitonans qui praesidet aula;

Convenit et solum terris regnare sub illo,

Qui merito cunctis praestans mortalibus esset.

Discedant variae sectae, discedat et error

Antiquus, quondam male suasus ab ore maligni.

15

Sancta fides niteat comitanter gressibus altis,

Cum Karoli magni ut vastum perlustret et orbem,

Imperio dictoque simul domitis virtute superbis.

Ac post innumeros captos ex hoste triumphos,

Cum victore suo victrix letetur et ipsa.

20

Post tanta in terris, post tot sublimia facta,

Pleno tum demum completo temporis aevo,

Felici centenos cursu evectus in annos,

Alma fides obviam, comitante cohorte sororum

Virtutum, veniens Karolum super astra levabit,

25

Perpetuam tribuens Christo praestante coronam.

Versibus incomptis, summo sed mentis amore,

Haec tibi conficiens, Caesar: dignare superne

Munera, quaeso, tui devoti sumere servi.