2. de illis qui de inimicis facti sunt amici

Emilius Lepidus, vir in omni parte probatus,

      Pontificis functus et ducis offitio,

Fulvius et Flaccus, magnis vir honoribus auctus,

      Discordes longo ferbuerant odio,

5

Censores facti discordia cessit ab illis,

      Censuram peragunt unanimes rigidam.

Livius indignum Sextus culpante Nerone

      Perpessus fuerat longius exilium,

Consulis imperio donantur dum simul ambo,

10

      Ex inimicicia crevit amicicia,

Ex animo Sexti caedens iniuria testis

      Illius gratum deserit ingenium,

Temporis articlo concordia profuit illo

      Haud minimum, Poenis congredientibus his,

15

Quos utrique viri, facti vehementer amici,

      Fundunt cum totis fortibus auxiliis.

Irati Grachus fuerant et Scipio magnus,

      Patrum mandato tempore disposito

In Capitolino pransuri vespere colle,

20

      Discordes veniunt, unanimes redeunt,

Pulcra datur Gracho coniux Cornelia virgo,

      Scipio quam natam donat ei propriam.

Gavinium Cicero studio defendit opimo,

      Quem, dum consul erat, urbe procul dederat;

25

Hunc, repetundarum reus existat quia rerum,

      Creditor accusat, credita cum repetat.

Infestum sibi Vatinium, sibi iure perosum,

      Tutatur binis is quoque iuditiis.

Quod factum Tullii teterrimus ipsius hostis

30

      Subsequitur Pulcher, foedus amore licet:

A tribus iste viris incesti crimine turpis

      Est accusatus, nomen idem fuit his,

Ambitione reus fuit horum Lentulus unus,

      Quem patrocinio protegit ille suo.

35

Gallus et ipse tuam, te dampnato, sibi natam

      Copulat, Antoni, conditione thori,

Gallum dampnaras, Mecoloni, deinde procuras,

      Ipso res eius attribuente viro.

Pulcrius obsequiis iniuria vincitur omnis,

40

      Quam si perpetuis hanc saties odiis.