5. de parentum amore in liberos

Nati decrepitus non tardat Rutilianus

      Bellum legatus ad dubium fieri;

Quinquies hic consul fuerat, iam talibus annis

      Plus obtanda quies quam fuerant acies,

5

Ipse triumphantem contentus equo comitatur,

      In curru secum quem tociens tulerat.

Abdicet ut natum Caeseti Caesar amatum

      Praecipit et spondet magnificare duos,

Regnum affectanti fuerat contrarius illi

10

      Quippe tribunus erat cumque Morulfus eo,

Inquit Cesetes, "auferre prius potes omnes

      Vnum de natis quam michi sustulerim";

Totus Caesareis erat orbis subditus armis,

      Affectu nati respuit hic subici.

15

Saevo proscriptus fuerat iam iudice Balbus,

      Iamque triumvir eum miserat interimi,

Egressusque domum postico clam fuerat iam,

      Et iam furtiva coeperat ire fuga,

Personat occisum falso vicinia natum,

20

      Eiulat atque domum lugubris ingreditur,

Incurrit diram quam fugerat ante macheram,

      Inventum lictor mox iugulavit eum.

Stratonices pulcrae correptus amore novercae

      Seleuci regis filius Antiochus,

25

Obtegit infixum feriente Cupidine telum,

      Lectulus hunc recipit, paene fit exanimis;

Ingemit affinis, luget rex, plebs dolet omnis,

      Flent nato patrium destitui solium,

Dimicat affectus discors amor et pudor intus,

30

      Quam retegat vulnus obtat obire prius;

Instructus genesi deprendit vulnera Leptis,

      Assidet egroto crebrius hic iuveni,

Ora rubent cuius velum subeunte noverca,

      Pallet ut exierit, flatus et ipse perit;

35

Admovet ille manum, sentit crebrescere pulsum,

      Et languescere mox intrat et exit ea;

Notificat patri vir callidus agnita regi,

      Vxorem nato mox dedit ille suo,

Et licet insignem dilectae spernit amorem,

40

      Carior huic cara coniuge natus erat.

Ariobarzanem sella residere curuli

      Secum Pompeius iusserat aegregius;

Inferius carum residere videt quia, natum,

      Sella descendit, ferre nec id valuit,

45

Illius capiti proprium diadema reponit,

      Et iubet excelsum scandere mox solium;

Fletibus irriguus diadema perhorret ephebus,

      Scandere regalem non patiens apicem,

Hic hilaris ponit sed flebilis ille resumit,

50

      Vrget Pompeius velle patris fieri,

Cuius praeceptum facit illum sumere sceptrum,

      Regem appellat, eum cogit adire trhonum,

Precipit et capiti pulcrum diadema reponi,

      Exigit affectus haec fieri patrius.