6. de perfidia

Romulus imperium, Tarpeius suscipit arcem:

      Portis Tarpei filia progreditur,

Haec latura sacris erat amnem; capta Sabinis

      Arcem promittit, munera si dederint:

5

Cui pepigere suae cuncti gestamina laevae,

      Anulus armillae sunt ea vel clipeus:

Obruitur clipeis, susceptis arce Sabinis,

      Collis Tarpeius inde vocamen habet.

Octo fide quassa versutus milia Galba

10

      De Lusitanorum moenibus eruerat,

Florentes aetate viros et ad arma paratos

      Occidit multos, vendidit et reliquos.

Armat in Ausonios audacter Bituitus rex

      Arbennosque suos Allobrogesque feros.

15

Hunc neque tu, Domici, Fabius neque subdere quivit,

      Dum virtute nequis, perfidia subigis:

Colloquium simulas et fercula larga ministras,

      Excipis hospitio, iam saturum religas,

Et vinctum regem navi praemittis in urbem

20

      Non probat hunc tantum Roma severa dolum,

Sed nec rescindit, renovet ne bella solutus

      Bituitus: carcer illius Alba fuit.

Perfidiae speculum fuit urbs Carthago nefandae,

      Quam virtute magis creverat illa dolis;

25

Xantippus bello Lacedemonius truculento

      Contra Romanos huic fuit auxilio:

Regulus istius argumento superatur,

      Quem iam victores ceu placidi comites

Vt revehant Spartham, duxere per alta carinam,

30

      Merserunt caeci gurgitibus pelagi.

Annibal invictis cinctos muris Nucerinos

      Exire annuerat cum duplici tunica;

Perfidus hos omnes fumo necat atque vapore,

      Balnea succendens patret ut haec scelera.

35

Moenibus eductum simili cum fraude senatum

      Acerranorum proicit in puteum.