13. de cupiditate vitae

Aquilius pulcram potuit consciscere mortem,

      Qui servire magis turpiter appeciit;

Ponticus hunc superans caepit pugnando tirannus,

      Infestus semper Romuleis ducibus.

5

Tercio iam consul, Pompeio iudice, Carbo

      Supplicio ductus Trinacriam fuerat;

Militibus spatium poscit, donec levet alvum,

      Tantus amor vitae labilis huic inerat;

Protrahit usque moras, lictor turpi residentis

10

      Cervicem resecat has breviando loco.

At Brutus vitae momentum mox rapiendae

      Emit probrosi dedecoris pretio;

Furius hunc caepit, constanter subdere iussit

      Cervicem, viso subtrahit hanc gladio,

15

Vtitur et timidis feriendus mox ita verbis,

      "Iam dabo, si vivam, da modicum spatii".

Humanam Xerxes deplorat conditionem,

      Annis quod multis vivere nemo queat;

Fertur pro tota lacrimas fudisse iuventa,

20

      Dum deflet pro se, totius hic Asiae.