3.

Nitor ad inpar opus et Apolline scribo sinistro,

      Nec se Cesar opus sustinet esse meum.

Musa michi gravis est et eam color afficit ire;

      Non est rethoricus, quem facit ira, color.

5

Se michi verba negant et se facundia verbis:

      Destituor verbis, verba colore suo.

Sed neque tunc possum te scribere, Cesar, ad unguem,

      Si loquar ore dei vel deus ore meo.

Vix es habendus homo - celeberrimus ille deorum

10

      Non esset nisi tu, si deus esset homo.

Cui vario voto blanditur amicus et hostis:

      Hic timet esse quod hic, optat hic esse quod hic.

Sicut plus fidei quam iusticie tibi, Cesar,

      Sic est iusticie plus tibi quam fidei.

15

In te pax contra pietatem dimicat, an sis

      Plusve pio placidus, plus placidove pius.

Se posuit virtus non una sed omnis in uno,

      Egregium quiddam conpositura sibi.

Artifices superi propria te reddere cura

20

      Non voluere hominem, non potuere deum.

Interea celo secum dubitante, quid esses,

      Factus es ex mixto numine mixtus homo.