3.

Sedis apostolicae princeps, lux aurea Romae,

      Et decus et doctor plebis et almus amor,

Tu caput aecclesiae es, primus patriarcha per orbem

      Praeclarus meritis et pietate potens,

5

Sal terrae, mundi lux atque urbs inclita Christi,

      Perpetuae praebens lucis iter populo.

Vestra valet caelum reserare et claudere lingua:

      In terris positus claviger aethereus.

Tu renovator ades patriae spes rector honorque,

10

      Dulcis amor cunctis, dignus amore dei.

Tempora sunt huius vitae nunc plena periclis,

      Bella movent gentes, hostis ubique furit.

Vnde opus est valde, tua quod protectio fortis

      Succurrat miseris, quos inimicus odit.

15

Eripe, sancte, piis monitis precibusque sacratis

      Commissum tibimet, pastor, ab hoste gregem,

Vt tua laus maneat, merces et gloria semper,

      Cum Christo in caelis regna beata tenens,

Principi apostolico Petro coniunctus in aevum,

20

      In terris vicem cuius et ipse geris.