2.

1a

Qui habet aures audiat,

Sub quanta mole criminum

Clerus laboret hodie,

Dum in Christo luxuriat,

Nec uult placare Dominum

Per fructus penitencie,

Set differt et induciat,

Falso que sibi sompniat

Sortis in casu dubie

Longum uiuendi terminum.

1b

Ob nimiam molliciem

Sordesque uite uarias

Nulli defertur ordini.

Trahuntur in perniciem

Per partes et minutias

Ecclesiarum termini;

Nec habet archa requiem:

Malcus in Christi faciem,

Iason in uasa Domini

Manus extendit impias.

2a

Irreuerenter confluunt

Omnes ad sacrum ordinem,

Set hominem

Veterem nunquam exuunt,

Nec feditatis diluunt

Antique turpitudinem.

Hii calicis dulcedinem

Dant in amaritudinem

Et in uenenum aspidis;

Iesumque magnum sordidis

Vestimentis induunt,

Et polluunt

Testamenti sanguinem.

2b

Singultuosis uocibus

Verbum salutis predicant,

Et explicant

Monitis salutaribus,

Quid agendum sit omnibus.

Set Esau sunt manibus,

Et uoce Iacob indicant,

Qui, dum se passim implicant

Flagiciosis actibus

Et exemplis enormibus

Animas mortificant,

Edificant

Syon in sanguinibus.

3a

Qui pro laude uerba uendis,

Cultoris utens sarculo,

Dum phaleras in populo,

Sanctitatem, quam pretendis,

Non possides in sacculo,

Gaudes inani titulo,

Verbis utens reuerendis,

In te trabem non attendis,

Que toti patet seculo,

Et festucam reprehendis

In tui fratris oculo.

3b

Plebs pro Christo bellicosa

Signata mundi precio

Celum petit martirio;

Set in nullo fructuosa

Clericorum conditio

Enormi torpet otio.

O mors Christi preciosa,

Semper fuit copiosa

Aput te redemptio,

Set in istis otiosa

Fit redemptoris passio!

4a

Quare non accipiunt

Salutaris calicem,

Et pro Christo uerticem

Gladiis obiciunt?

Set terrena sapiunt,

Nec timent iram uindicem,

Terribilemque iudicem

Miseri despiciunt:

Colant enim culicem

Et camelum gluciunt.

4b

Qui letargum pateris,

Surgens expergiscere:

Hora est iam surgere!

Vulnus, unde moreris,

Medico non apperis;

In tui cordis ulcere

Scis fistulam obrepere,

Nec medicinis uteris,

Erubescens temere

Ligaturam uulneris.