1.

1a

Ni lauare laterem

Me crederem,

Corrigendis uiciis

Operam inpenderem;

Set impensa seriis

Hec periret opera.

Late feruent scelera:

Lotus later plus lutescit,

Mentis lepra plus crudescit,

Dum tanguntur ulcera.

Roma potens gladium

Vltionis arripe!

A te tamen incipe,

Symonis flagicium

In te prius corripe!

1b

Nulla uel correctio

Vel ultio

Huic mederi poterit

Hominum flagicio;

Nichil unquam proderit

Satyre seueritas.

Paucis placet ueritas,

Nec est ulli tuta satis;

Omnis enim a prelatis

Prodiit iniquitas.

Roma <potens gladium

Vltionis arripe!

A te tamen incipe,

Symonis flagicium

In te prius corripe!>

2a

Morum formam destruit

Turpis uita presulum,

Que speculum

Vite dare debuit.

Scandalizant populum

Prelatorum crimina:

Parit morbus capitis

In subditis

Membris morbi semina.

Roma <potens gladium

Vltionis arripe!

A te tamen incipe,

Symonis flagicium

In te prius corripe!>

2b

Arte Symon magica

Petri domum uendicat,

Et implicat

Orbem clade publica.

Videt hec, nec uindicat

Pontifex pontificum,

Dum commissum neggligit,

Nec corrigit

Gregem Gieziticum.

Roma <potens gladium

Vltionis arripe!

A te tamen incipe,

Symonis flagicium

In te prius corripe!>

3a

Nulla morum maior incuria

Quam in curia,

In qua iuris seuit iniuria,

Dum stateram iuris uibrat,

Culpis opes equilibrat,

Gaudens orbem regere

Sub pondere,

Numero, mensura.

Roma <potens gladium

Vltionis arripe!

A te tamen incipe,

Symonis flagicium

In te prius corripe!>

3b

Nil ferentes excludit uicio

Meretricio,

Danti patet aperto gremio.

Cardinales, canes muti,

Silent, munus assecuti.

Aurum dum porrigitur,

Neggligitur

Canonum censura.

Roma <potens gladium

Vltionis arripe!

A te tamen incipe,

Symonis flagicium

In te prius corripe!>

4a

Tantus eris horum in oculis,

Quantum eris erit in loculis;

Non defertur moribus,

Auri sonus auribus

Exauditur sedulis.

Si canones aut leges

Pauper allegaueris,

Nil proderis,

Nisi dulces muneris

Blandicias alleges.

Roma <potens gladium

Vltionis arripe!

A te tamen incipe,

Symonis flagicium

In te prius corripe!>

4b

Sacro nullus placet collegio,

Nisi placet illos obsequio.

Ius expirat pauperum,

Quia caret munerum

Dulci patrocinio.

Superflue laboras,

Si quid imploraueris,

Nec dederis.

Si nichil attuleris,

Ibis, Homere, foras!

Roma potens <gladium

Vltionis arripe!

A te tamen incipe,

Symonis flagicium

In te prius corripe!>