13.

1

O cunctis liberalior,

Cuius amore morior,

Ne moriar amore,

Fias amanti micior!

Des, ut agam, qui pacior,

Sine prot<r>actu more!

2

Dum, quod expectem, moneor,

Et blanda uoce moueor

Et dulcibus responsis.

Et expectarem, fateor;

Set expectare uereor,

Donec soluendo non sis.

3

Non horam certam nominas,

Set moras perdiutinas

Me protrahis inuito.

"Erit, erit" ingeminas,

Et termino determinas

Tempus indefinito.

4

Cum cauis surget angulis

Presectis rigens stipulis

Iam barba, non lanugo:

Pilorum pungar iaculis,

Et tunc offendar osculis,

Que nunc libenter sugo.

5

Quod adhuc places pauculis,

Solis debes nouaculis.

Sis ergo memor eui!

Non parcit euum singulis,

Nec breue regnum populis:

Nec parce regno breui!

6

Quid regno forme breuius,

Aut forma quid infirmius

Est in sexu uirili?

Nempe cogunt, ut cicius

Matre senescat filius,

Non tempora, set pili.

7

Sic me solari solitus,

Cum de te bonos exitus

Sponderes in futuro,

Tunc eram tibi deditus.

Nunc es miles emeritus,

Nunc de te minus curo.

8

Iam mea querit seruitus

In libertatem reditus.

Iam, iam me manumittas!

Prius te perdam penitus,

Quam Licino te primitus

Et michi post submittas.

9

Parce, precor, et, quoniam

Pecco per inpericiam,

Peccatum non require!

Quos urget ad iniuriam,

Pro hiis Amor ad ueniam

Debet interuenire.

10

Me procul a me statuit

Amor, et interposuit

Se mee racioni.

Ergo lingua quid potuit,

Cognata si non habuit

Verba discrecioni?