14.

1a

Vacillantis trucine

Libramine

Mens suspensa fluctuat,

Et estuat

In tumultus anxios,

Dum se uertit

Et bipertit

Motus in contrarios.

<O langueo!

Causam languoris uideo,

Nec caueo:

Videns et prudens pereo!>

1b

Me uacare studio

Vult Racio.

Set <dum> Amor alteram

Vult operam,

In diuersa rapior:

Racione

Cum Dione

Dimicante crucior.

O langueo!

Causam lang<u>oris uideo,

<Nec caueo:>

Videns et prudens pereo!

2a

Sicut in arbore

Frons tremula,

Nauicula

Leuis in equore,

Dum caret anchore

Subsidio,

Contrario

Flatu concussa fluitat:

Sic agitat,

Sic turbine sollicitat

Me dubio

Hinc Amor, inde Racio.

<O langueo!

Causam languoris uideo,

Nec caueo:

Videns et prudens pereo!>

2b

Sub libra pondero,

Quid melius,

Et dubius

Me cum delibero.

Nunc menti refero

Delicias

Venerias:

Que mea michi Florula

Det oscula,

Qui risus, que labellula,

Que facies,

Frons, naris aut cesaries!

O langueo!

<Causam languoris uideo,

Nec caueo:

Videns et prudens pereo!>

3a

Hiis inuitat

Et irritat

Amor me blandiciis.

Set aliis

Racio sollicitat

Et excitat

Me studiis.

<O langueo!

Causam languoris uideo,

Nec caueo:

Videns et prudens pereo!>

3b

Nam solari

Me scolari

Cogitat exilio.

Set, Racio,

Procul abi! Vinceris

Sub Veneris

Imperio!

O langueo!

Causam lang<u>oris <uideo,

Nec caueo:

Videns et prudens pereo!>