8.

Bruma, grando, glacies,

Nix, rigor hiemalis

Cedunt; redit species

Et decor estiualis;

Mitigatur rabies

Plage meridialis.

Ventus in auram uertitur,

Maris procella sternitur,

Nauis a nauta regitur

Securior.

Serenus est aer, aura salubrior;

Marina resident, fit unda purior;

Qui modo non amat, est ferro durior.

Ridet superficies

Terrene facultatis;

Sua redit species

Rebus materiatis;

Zephiri temperies

Blanditur procreatis.

Ros matutinus spargitur,

In partum terra soluitur,

De flore fructus proditur

Maturior.

Serenus est <aer, aura salubrior;

Marina resident, fit unda purior;

Qui non modo amat, est ferro durior.>

Eminet planicies

Camporum coequalis,

Naturalis series

Non artificialis

Virtus est materies

Artifex spiritalis.

Arti diuine linquitur,

Quod flos de spina nascitur;

De flore fructus proditur

Suauior.

Serenus <est aer, aura salubrior;

Marina resident, fit unda purior;

Qui modo non amat, est ferro durior.>

Reuirescit abies,

Et ego reuiresco;

Estuat meridies,

Sed non ob hoc calesco;

Virginis effigies

Fert solem, quo tepesco.

Me Venus angit anxia,

Me uirgo tangit regia,

Me, qui non noui talia:

Heu pacior!

Serenus est aer, <aura salubrior;

Marina resident, fit unda purior;

Qui modo non amat, est ferro durior.>