4, 6

Cum sis gigas tricorpor invictissimus

Tuoque caelum paene exaeques vertice,

Cur hoc ridendus ensis femen obligat,

Latusque grande curta cingit framea?

5

Quid forte munis pectus ense debili

Habitusque corporalis instar neglegis,

Sicae brevis parvo fretus gestamine?

Iam iam tuum frustrabor audax impetum,

Ferro retuso molientem proelia.

10

Meticulosa cum sis ipse belua

Molesque digno destituta robore,

Vmbrae fugacis more praeceps tolleris,

Spectabili claroque nactus corpore

Imbelle pectus et pavore lubricum

15

Membrisque summe dissidentem spiritum.

Ex hoc tuae compago nutat fabricae,

Cum forma felix strage mentis claudicet

Suisque sit natura discors partibus.

Te laudis ex hoc munus omne deseret,

20

Nec fortium clarus loco censeberis,

Obscura computandus inter agmina.