4, 5

Num meis mavis monitis adesse

Et pares votis sociare nexus

Quam gregi praesens olidisque curam

Ferre capellis?

5

Impiae dextram dominae refelle

Et trucem praeceps fugito magistram,

Vt rates mecum socias revisens

Libera degas!

Linque commissae studium bidentis,

10

Sperne caprinos agitare gressus,

Et tori consors refer apta nostris

Praemia votis!

O mihi tantis studiis petita,

Torpidos sursum radios reflecte,

15

Paululum motu facili pudicos

Erige vultus!

Ad lares hinc te statuam paternos,

Et piae laetam sociabo matri,

Si semel blandis agitata votis

20

Lumina pandas.

Quam tuli claustris toties gigantum,

Confer antique meritum labori

Et graves rerum miserata nisus

Parce rigori!