Summa

Inde surgit Pietas, emollit Rigorem,

Temperat Iustitiam, avertit cruorem,

Ad mortis remedium flectit Creatorem

Vt facture formula conformet auctorem.

5

In primis describitur Pietas agnina,

Si fas est describere terrenis divina;

Pia pascit angelos agmina ter trina,

Corruit ut Lucifer cervice supina.

Iuris demonstratio querit honestatem,

10

Virtutes pollicitas, veram libertatem;

Dum deliberatio vult utilitatem,

Librat iudicatio rei veritatem.

Quod proponit Pietas est iudiciale

Et in bonum hominum totum terminale:

15

Censet ut per meritum crucis temporale

Vite beneficium detur eternale.

Condemnat tyrannidem et austeritatem

Et videntes munera plus quam veritatem;

Iudicis determinat pii qualitatem,

20

Qui debet suscipere iuris dignitatem.

Patris in potentia Natus dimicabit;

Hic in sapientia recte iudicabit,

Per quem Sanctus Spiritus mentes inspirabit

Et sentinam scelerum mundus emundabit.

25

Cum homo dignissima sit creaturarum,

Censet esse Pietas pie menti parum,

Nisi sanctos revomat carcer tenebrarum,

Quas homo permeruit gustum per amarum.

Stella Maris tenebras Eve removebit,

30

Mortis fructum Virginis fructus abolebit,

In ligni remedium lignum reflorebit,

Homo Deus hominis Hostem cohibebit.

Futuras enumerat hinc religiones,

Que post fontis lavacrum sint ablutiones;

35

Evolvit propheticas inde lectiones

Et summi prenuntiat principis agones.

Dei providentia gens est circumcisa,

De qua Virgo veniet adeo provisa;

Manu Sapientie gemma sit decisa,

40

Que Deum parturiet, in Deo confisa.