Summa

Est in plage medio, qua nos habitamus,

Vrbs sacra Ierusalem, per quam figuramus

Celestem metropolim ad quam anhelamus,

Propter cuius gloriam mori decertamus.

5

Inter plagam frigidam inter et ardentem,

Legimus metropolim Iudee iacentem,

Ab extremis partibus eque capientem,

Et ita deliciis omnibus fluentem.

Inde mari Medio tellus coartatur,

10

Dat Euphrates terminum Eurus qua bacchatur,

Mari Rubro clauditur Austro qua perflatur,

Montibus hinc Syrie Boreas minatur.

Dei cultor Abraham, David citharista,

Mansit hic et populus legis agonista,

15

Donec vite floruit terra flos in ista,

Quo tibi concluditur, anime sophista.

In hac vicit Israel terra Cananeos,

Transmigrantes accipit iterum Hebreos;

Titus urbem diruit, vendit Phariseos,

20

Eicit Heraclius crucis hostes reos.

Crucis salutifere lignum gloriosum

Omne vincit Asie nemus pretiosum,

Ferens sacre Virginis fructum copiosum,

Qui mortis exterminat gustum acetosum.

25

Terra Sacra procreat herbas salutares,

Vsum quarum superant dotes puellares:

Rubri maris nequeunt esse gemme pares,

Licet modis pluribus sint auxiliares.

Illic Annam Ioachim de tribu regali

30

Sibi parem iunxerat lege maritali:

Matrem Christi genuit toro geniali,

Quam possedit gratia Dei favorali.

Sed timens apocryphum librum recitare

De conceptu Virginis pulcre sine pare,

35

Fingo senem dubios apices portare

Et hos in crepuscolo mihi reserare.

Pro defectu sobolis pulsus est ab ara

Ioachim, quem vulnerat cura peramara;

Erubescit facies uxoris preclara,

40

Que tamen conceperat, conceptus ignara.

Per montes cum gregibus sponsus habitavit,

Vxor domi lacrimis vultum irrigavit,

Cuius mentem angelus spe refocillavit

Et ad sponse gaudia sponsum revocavit.

45

Beatus Ieronimus nobis ut testatur,

Maria ab angelo viro nominatur;

Post hec sacro nuntio sponsa confortatur

Et effecta genitrix prole iocundatur.