Summa

Verni lucet Cynthius hospes Arietis,

Terra florum variis pingitur tapetis,

Volucres concentibus organizant letis,

Mors discedit ultimis adventando metis.

5

Cecidit in tempore tali protoplastus:

Virginis humilitas calcat hostis fastus,

In quem caute militat Salvatoris astus

Quando Deum concipit aure venter castus.

Salutata Virgine verbis Gabrielis,

10

Nomen Iesu panditur allatum de celis,

Quo tuti progredimur hostis nostri telis

Quando nos insultibus impetit anhelis.

Fons de rivo nascitur, exit sol de stella,

Parit flos agricolam, vinitorem cella;

15

Inaudita percipis et mira novella:

Deum lactat hominem mater et puella.

Agmina celestia concurrunt visura

Novam nurum superum, nova carnis iura;

Hic sponsa describitur Deo placitura,

20

Quam extollit gratia, miratur Natura.

Ratione physica partes elegantes

Et sibi conveniunt et sunt discrepantes:

Sunt spinales capiti partes concordantes,

Spina sibi comparat artus famulantes.

25

Sapit pura capitis hortum pars nervosa,

Pii cordis fomitem pars arteriosa,

Ornatur ab epate linea venosa,

Renes regit niveos mens imperiosa.

Fortune blanditie lenis subsecuntur:

30

Quinque sensus Virginis illis opponuntur,

Vrbane Facetie dotes impenduntur,

Curiales regule quibus eliguntur.

Hoc nomen exponitur varie Maria;

Cortinatrix thalami Rachel est et Lia,

35

Cuius basis ponitur veritatis via,

Quam fulcit septemplice spiritu Sophia

Invidus percutitur mordax oblatrator,

Thalami gemmiferi niger denigrator;

Hic berillus angulos profert radiator,

40

Stat aque topazius fervide sedator.

Castitatem generans smaragdus clarescit,

Hic iaspis ydropicos viridis compescit

Saphirusque domina gemmarum lucescit,

Quarum vultus varia luce iuvenescit.

45

Accipe per lapides lapidum effectus,

Cum in Dei thalamo nullus sit defectus:

Vnde Livor laqueis suis est illectus,

Ore cuius intimus fetor est eiectus.