Summa

In octavo scribitur nuptialis chorus

Verecundus sobrius pudicus decorus;

Graditur cum Heresi Livor inhonorus,

Quos cantus Ecclesie vulnerat canorus.

5

Profert amatoriam sponsa cantilenam,

Virtutes concelebrant nuptialem cenam

Preparatu debito splendidam amenam,

Letam potu sobrio, sacro cibo plenam.

Ornatum triclinium fert architriclinum,

10

Virgo sponsi thalamus solium divinum;

Aquam sponsus optimum convertit in vinum,

Vita dum exterminat virus serpentinum.

Saties et requies sponsus animarum

Post cenam in cithara sonum audit clarum:

15

Quod mortis gustaverit calicem amarum,

Quo rivalis vincitur princeps tenebrarum.

Nomine Letitia virgo citharizat,

Quia post tristitiam plausus tympanizat;

Post est dulcor gratie per quem hymnizat,

20

Dum in corpus invidus mundus tyrannizat.

Cantatur militia pii Salvatoris,

Arma mors et gloria subsequens victoris,

Rivalis confusio, dulcor amatoris,

Sponse sublimatio, descensus tortoris.

25

Post in tirocinium cernes properare

Agmen sponsi floridum, agmen militare;

Domini discipulos minis intonare,

Doctrinis compluere, factis coruscare.

Armis nuptialibus tyrannis concludunt,

30

Idolatris obviant, hereses detrudunt,

Invitant ad nuptias, in vitam preludunt

Et, si mora militent, mortem sic excludunt.

Mundanis in tenebris lucet Stella Maris

Via dux et regula, splendor exemplaris,

35

Virtutum pinnaculum, turris salutaris

Excludens exercitum pompe secularis.

Campus hastiludii mundus designatur:

Septem criminalium turba preliatur:

Prepugnat Segnities, prius otiatur,

40

Quam dum Labor superat virtus restauratur.

Tonat belli bucina dum Mors alta metit:

Ceta sic pisciculos transorbere petit;

Vincitur Ingluvies que fortes irretit,

Per quam Abstinentia diu retro stetit.

45

Cadit Avaritia manu Largitatis

Vulnerata gladio Bone Voluntatis;

Deicit Invidiam dextra Caritatis,

Cuius fundit cerebrum sceptro Potestatis.