26. antiphonae ad Benedictus et Magnificat infra octavam

Et pro commemoratione S. Francisci

Adscribitur Gregorio Papae IX

Sancte Francisce, propere

Veni, pater, accelera

Ad populum, qui premitur

Et teritur sub onere,

Palea, luto, latere;

Et, sepulto Aegyptio

Sub sabulo, nos libera,

Carnis exstincto vitio.

Salve, sancte pater, patriae lux, forma Minorum,

Virtutis speculum, recti via, regula morum:

Carnis ab exsilio duc nos ad regna polorum.

Plange, turba paupercula,

Ad patrem clama pauperum:

Hoc lugubre suspirium,

Pater Francisce, suscipe,

Et prode Christo stigmata

Lateris, pedum, manuum,

Vt nobis reddat orphanis

Tanti patris vicarium.

Caelorum candor splenduit,

Novum sidus emicuit:

Sacer Franciscus claruit,

Cui Seraph apparuit,

Signans eum charactere

In volis, plantis, latere,

Dum formam crucis gerere

Vult corde, ore, opere.