7. sequentia

Salue, martir alme! salue iam celigena!

Salue, angelorum felix Kanute collega,

Cuius virtutis insignia iam perornant climata,

Per te omnipotentissima Ihesu que monstrat gratia!

5

Nam pro Cristo terrea cum amisisti gaudia,

Sempiterna nancisci meruisti tripudia,

Dum in cruore mundi tollentis crimina

Stola letaris intincta amictus purpurea

Et immaculati iugiter vestigia

10

Agni sectaris martirum phalange consortia.

Hinc perfidorum cruciantur agmina,

Que te ad ethra transmisere nescia.

Nam lingua quidam impia morsu horrendo precisa,

Quidam rimantes flumina Stigis petiere baratra.

15

Sed lux declarat alma ex aree missa celica

Te cum collegis infula exornatum rosea.

Hinc constricta restituta vir exultat dextera,

Atque mutus libera gaudet depromens famina;

Plaudit cecus lumina sumens, claudus vestigia,

20

Et obstructe captant aures miranter eloquia;

Efflorescit nitida cutis pridem lazarica;

Febris fugit tremula salutis ob remedia.

Sed eterna pignora aqua cum lauantur indita,

Redemptoris opera illucescunt mirifica:

25

Nam ius admissa flammea mox obedunt incendia,

Et intacta manent ossa velut nix candidula.

Hinc resultet alleluia voce plebs altisona

Ac miranda gratuletur excolens magnalia;

At condigna viuus petat hostis amens incendia

30

Voce citus perhorrenda ad ardentia tartara.

Nos ergo prece sedula tua precamur munia,

Vt per te peccamina nostra soluat clementia,

Que saluare venit omnia.