Conclusio tocius operis

Clauditur hic Speculum, manus hic mea fessa quiescit,

      Hoc opus hic finem fessus habere uolo.

Parcite, lectores, ueniam donate labori:

      Dum bene seruentur, pauca notata ualent.

5

Corporis ut speculum uisum confortat et omnes

      Noscere dat maculas quas homo fronte gerit,

Sic oculis mentis liber hic solacia prestat,

      Pluribus exemplis instruit atque docet.

Hic iocus, hic studium solacia dogmata prebet,

10

      Hic flos et fructus, hic odor atque sapor.

Si recitare uolet quis forsan uerba iocosa,

      Istic inueniet carmina plena iocis.

Si quis forte uolet uiuendi noscere normam

      Atque placere Deo, dogmate diues erit.