1.

Kyrrie, caeligenae cui pollet gratia formae,

Astrea Caesareos cui cingunt stemmata vultus,

Regum progenies, quos auxit Francia felix,

Orbis terrarum quos alta voce salutat,

5

Laudibus amplificat veneratur ditat honorat

(Vndique concurrens pontum secat, eminet arva):

Salve, Christicolum vertex, gratissime regum.

Rex pie, devoti ne spernas donula servi:

Exiguum munus, largo sed fonte receptum,

10

Christiferum, patrum mysteria plurima tractans.

Hoc opus in Graeco construxit Maximus abba,

Egregius pastor, scripturis inclitus auctor,

Magni Gregorii perplanans dicta remota,

Sensibus humanis theoremata mente revolvens.

15

Nec non in multis Dionysius additur ipse

Ariopagites, ornat quem laudibus amplis,

Explanat testemque vocat patremque beatum

Tangens symbolicas praeclaro lumine byblos,

Quas nos edidimus vobis poscentibus olim.

20

Hac quoque de causa praefatus Maximus abba

Editus est nuper nostro sudante labore,

Effectuque pio vestrum pia iussa sequentes

Cursim transtulimus, quae multo tempore quaerunt

Et doctos sensus et purae mentis acumen.