2.

Baptizat dominum servi devotio summum,

Praedicat hunc genitor, invisit spiritus unctor.

Daemonis en fraudes Christus contemnit inanes,

Eius cunctimodas ducens ut stercora pompas.

5

Demonstrat placidum Iohannes nutibus agnum,

Andreas sequitur, fratri comperta profatur.

Imperat os vitreum post se properare Philippum,

Nathanahel spissa qui mox subducit ab umbra.

Testibus hisce novum fecit de flumine signum,

10

Convivis latices in vitea pocula vertens.

Retia germani linquunt in nomine Christi,

Mox alii lacrimas spernunt cum nave paternas.

Omnipotens medicus hominum miserator et unus

Omnimodis pressos iussit discedere sanos.

15

Spiritibus diris hominum de corpore pulsis

Das pecorum furiare greges, iustissime iudex.

En verbum domini curat medicamine verbi,

Praecipit et sanum proprium portare grabattum.

Principis ut natam sanet vel suscitet, ibat,

20

Furatur mulier sacra de veste salutem.

Reddidit en stupidae dominus sua munia dextrae,

Consilium stolidi faciunt de sanguine Christi.

Vnicus en viduae redivivus redditur orbae,

Ingeminant plebes: "O vere, magne prophetes".

25

Saltatrix petiit caput, innocuumque recepit,

Lictores fluvidum linquunt in carcere truncum.

Panibus ex quinis et piscibus haud mage binis.

En hominum large saturantur milia quinque.

Christus aquae fluctu pressit vestigia gressu,

30

At fidei dubium mergunt vada turgida Petrum.

Ydropicum tangente manu, quae cuncta creavit,

Pallidus humor abit, facies et laeta rubescit.

Ecce decem mundans templo se ferre iubebat,

Vnus regreditur grates persolvere Iesu.

35

Contentus pueros deus est benedicere parvos

Talibus atque sui promittit gaudia regni.

Hic scribae domino sistunt in crimine captam,

Quam placidus censor damnatis solvit eisdem.

Ex limo reparat quicquid natura negabat,

40

Qui luteum primo totum plasmaverat Adam.