6. de sanctis Leone, Hilaro et Simplicio episcopis

Hinc gesta altisoni texuntur in orsa Leonis

Praeditus Augusto pia qui Chalcedona iura

Dat censenda, Patres quo munere cogit agendo:

Exprimitur geminae Christo connexalis uno

5

Copula naturae; damnantur nexa secantes

Vincula personis, vel non miscenda iugantes.

Iussa Patrum crebro rationis dogmate firmat;

Auget iura, monet reges, colit ordine Patres,

Templa novans ornat, bellis attrita reformat,

10

Internum externumque decus claro expolit actu.

Hilarus hunc sequitur, decretaque praecipit, orbi

Delegat, sectanda monet, contraria damnat,

Cultibus edictisque piam vernare columbam

Praestat; sanctorum multo notat aere triumphos;

15

Aurea ligna crucis gemmis et percolit auro,

Attollit fabricas, pretiosa monilia cudit,

Alligit et Patres, libros sacrosque ministros;

Per quem paschali Victorius ordine fulget;

Culmina Simplicius celsae subit inde cathedrae,

20

Regis honore sui, cultas qui dedicat aulas,

Officia instituit, laesos medicamine fulcit,

Roborat aegrotos, stricto ferit ense protervos,

Iura superna serit, bino sacra munere comit.