22. de eo qui fontem ipsius inquinavit

Presbyter ille etiam claustro praelatus eidem

Qui fontem retegens scorto fabricare lacunam

Infelix non erubuit furvumque paravit,

Vltricem vitare manum non posse probavit;

5

Terribilem quem prostibulo traxere ministri

Pontificis iussu Romani talia fantes

Se gerere, attonito papam nec adesse querenti

Pandunt Gregorium quem laesit fonte retecto

Actibus indignis, auditque iubere rubricis

10

Se centum caedi, quarum cruciatus acerbis

Verberibus, febriumque calens angore citatus

Aeger equo impositus septis redhibetur anhelus;

Indicat admissum, poena laniatur aperta;

Inter et assiduae pestis cruciamina sexto

15

Iam prolata die tandem miserabilis efflat;

Multisque expertum documentis tabe subactos

Polluti sceleris non longum his vivere claustris.

Fertur adhuc istic libra, et mensura beati

Servari patris, attentet si quilibet ex hoc

20

Externum nitens in opus componere panes,

Ad numerum non perveniet servire suetum,

Mensis qui superare solet mirante ministro.