28. de sancto Severino papa et successoribus eius

Inde Severinus Phaebo per signa relato

Ecclesiae post iacturas internaque bella,

Sede Petri allectus renovat sacra lapsa ruinis,

Mansuetus, clemens, altorque benignus egentum,

5

Dona pio cumulat clero, conquirit alumnos;

Post captivorum miseranti corde redemptor,

Externas quoque alit patrias bonitate Ioannes

Istria quae novit, Martino abbate, sequestro,

Dalmatiam tutans etiam clementia papae,

10

Hinc grata mercede capit pia pignora Patrum,

Excolit haec fabricis, praeclare et luce metalli

Subiectosque fovet praesensque, migransque ministros.

Theodorus pius inde pater, tutorque petentum,

Civiles inter fremitus, privataque bella

15

Permanet immotus, constans, castus atque fidelis,

Deiectis parcens, complectens recta sequentes;

Debellans damnansque feros et ad atra relapsos,

Errantes revocans, precibusque minisque coercens

Contemptum feriens, et colla procacia mulctans,

20

Pignora sancta levat, veneransque educit arenis,

Disponit templis, auro argentoque decorat,

Erigit atque dicat, fabricas dat munere claras.

Hinc validus veri testis Martinus honorem

Supplet apostolicum, dignoque agit agmine bella,

25

Tentatus probris Domini, fastuque superbo,

Atque tumore lacessitus, quo scita paterna

Vulsa, furor sacras Christo conversus in aras,

Diruit, alma piam vertens altaria pacem;

Coguntur super his patres, divoque senatu

30

Consulitur, verum excutitur, plectuntur iniqui,

Praesidiisque ignes contra defenditur orbis;

Et clypeis diversa datis per climata mundi,

Increscunt et iam adversae contraria partis

Praelia, regnatorque sacri ducis impetit arcem;

35

Mittitur exarchus socios laqueare fideles,

Atque tenere patrem; vetat hoc concordia fratrum,

Vnanimum, plebisque amor; hinc quoque fraude potitus,

Tutatur sacrae tectus caligine nubis,

Cum videat reliquos solum spectare satelles

40

Non valet eximium, quem cogitat ense necandum,

Frustratis necis insidiis, componere pacem

Cogitur instructor fraudis confusus apertae.

Turbine bellorum quo post, mortisque redacto,

Dirigitur trucior manifesto iussa furore

45

Qui implet, apostolicumque viri proculcat honorem;

Huncque aris adimens, Graias perducit in urbes.

Segregat urbe data, nequit sed mente beata;

Depellit solio, valet haud depellere voto:

Romae et Constantinopoli manet arbiter idem,

50

Clementisque pie vestigia sancta secutus,

Chersones subit exilium; quo sidera nacto,

Quam fidus rigido, quam sit pius usus agone

Confessor, Christoque placens, et ad ultima perstans,

Plurima signorum radiis miracula pandunt.