15. de sanctis Florentio et Eutychio

Queis viguit meritis frater Florentius ursi

Obsequium probat indomitae et solatia belvae,

Pastor inexpertus gregibus servire bidentum,

Parere addiscens monitis, ieiunia ferre,

5

Praesentem servare cibum, coenae addere leges,

Livida luce manus signi servique peremptrix

Innocui, Domini vindicta secuta dolorem,

Vindictae et gemitus, mulctae data flumina fletu

Cernit et invisor levita servatus amator

10

Agmine viroso inveniens habitacula cingi

Hospitis impavidi cuius sub voce polorum

Culmina conclamant, roboans cui militat aether

Atque veneniferam, sternit perimitque coronam.

Caetera quaerenti suffragia certa parantur

15

Plumigerae subito series perlata cohortis

Funera dira levans et tristibus atria purgans

Eutychius, consors in calle superna petente

Huius, turmarum dux instructorque piarum,

Qua probitate regens animas ad celsa vocarit

20

Panditur expleto claris certamine signis.

Ipsa etiam vestis divino munere testis

Accedit, meritis avertere vindicis iram

Sueta, calore hyperionio flagrantibus arvis,

Dum, prolata replens sitientia rura madore,

25

Nursica fecundis locupletat praedia nimbis.