22. de Baudacaria et caeteris quibusdam sanctis monachis

Bertulfo Baudacarius moderante statutus

Vincti tutor capiens solamine missos

Dum panis parvum quod adest anatemque ministrat,

Ter denos modico magna sed mente paratu

5

Exhilarans fratres dapibus quoque ditibus explet.

His rutili radiis patrum, pietate corusci

Athletae subeunt alacres dicto agmine coelum

Quorum mente nitens hilari Tedoaldus et imo

Dum recubat strato coelestia mente peragrans

10

Advocat atque vale faciens laeto ore sodales

Alloquitur lenis, suprema viatica poscit

Seque notans pulchro extremum ornat carmine finem

Incipiensque melos, scandens virtute beati

Culmina virtutum, divumque videbitur altor:

15

Iam Deus in Sion claris animam inserit astris.

Sicagibodus ubi promptis sub patribus altum

Consectatus iter purus mansuetus et artus

Mania parendi votis pertractat amicis.

Dum iacet extremo ductans spiramina nisu,

20

Conspicit aethereo solem fulgore micantem

Ac nostri radios Phaebi splendore nigrantem,

Coelicolas astare viros, miransque doceri

Protinus hunc sese subiturum ineundo nitorem

Coetibus aequandum meruitque ediscere celsis

25

Et super hanc lucem sociis renitere coruscis;

At redeat summumque vale praesentibus edat,

Nec mora regrediens turmis societur amoenis.

Fratribus attonitis rediens monita extima supplet,

Visa rogata refert, accepta levamina promit,

30

Mystica sacra capit, nexis fert oscula charis

Funere curari petit ac coelestia scandit,

Felicique obitu vestigia clara relinquit,

Ostendens similem sectatos lumine callem

Perpetuae simili lucis splendore beari.

35

Omnes, hi patres coelesti pace cluentes

Quorum magnificos licet ima laude triumphos

Prosequimur vel qui pariter laetantur in aethra

Obtineant nostri laxamina certa reatus,

Divinum vitae regimen, morumque piamen,

40

Crimina vitare ac lacrymis admissa levare,

Fructiferos luctus gemitu quatiente litare,

Sordibus ut mundi reddamur lumine clari,

Coetibus aptandi superis sine fine beati

Cernere salvificum digni per saecula vultu.