2.

Omne quod est plangat, quod posse plangere constat.

Plangere qui nescit, deus est, his planctibus adsit,

Vt relevet casus, patitur quos principe mundus

Heu moriente, preces quem propter fundite, fratres!

5

Caesar Heinricus patrum de nomine dictus

Plangitur, augustus, divus celebrisque, venustus,

Victor et invictus, domini fulgore coruscus.

Clamitet hunc luctus Hieremiae famine fusus,

Commendent domino Davidica cantica Christo,

10

Iungant virgineo Salomonis et oscula sponso.

Cuius in obsequio construxit corde benigno

Plurima divinis famulamina cultibus apta.

Ex quibus est templum praeclaro schemate tectum,

Intus et exterius gemino decoramine comptum,

15

Quem tremuit mundus, iacet in quo carne sepultus.

Spiritus aetherea felix congaudet in aula,

Suscepturus eam posuit quam tempore glebam,

Vt capiat verae cum sanctis praemia vitae.