1.

Sponsa decora dei petit alta Scolastica caeli,

      Ingreditur thalamum sponsa decora dei.

Angelicis hodie manibus super astra levatur,

      Miscetur turmis angelicis hodie.

5

Hinc domino iubilat sanctorum cetus in astris,

      Plebs nostra in terris hinc domino iubilat.

Hinc gemit atque dolet classis mala demoniorum,

      Serpens antiquus hinc gemit atque dolet.

Illius insidias hec vita pertulit omni,

10

      Sed vicit moriens illius insidias.

Virgo dicata deo primo permansit ab aevo,

      Vixit ab infanti virgo dicata deo.

Regna poli cupiens patriam cum fratre reliquit,

      Casinum petiit regna poli cupiens.

15

Tecta sibi statuit summa Benedictus in arce,

      At soror in planis tecta sibi statuit.

Frater erat solitus descendere quosque per annos,

      Visere germanam frater erat solitus.

Proxima lux fuerat, qua corpus virgo reliquit,

20

      Qua caelum petiit, proxima lux fuerat.

Vt sibi mos fuerat, frater descendit ab arce,

      Germanam visit, ut sibi mos fuerat.

Exoriente die fit eo conventus eorum,

      Exoritur sermo exoriente die.

25

Mutua verba ferunt regni vitaeque perennis,

      De Satanae pugnis mutua verba ferunt.

Oceanum subiens sol lucem iam tumulabat,

      Phebus fert tenebras Oceanum subiens.

Pabula pro solito dederant animabus amata,

30

      Dant et corporibus pabula pro solito.

Virgo gemit comedens, suspiria corde dat imo,

      Verba facit frater, virgo gemit comedens.

Ardet amans animus, sermones quaesitat auris,

      Os escas gustat, ardet amans animus.

35

Fit magis esuriens, dum plures accipit escas,

      Verbi, non dapium, fit magis esuriens.

Iam simul ambo parant mensam removere cibosque,

      Ferre deo grates iam simul ambo parant.

Illa dolens animo dubitat, metuitque profari,

40

      Hec tandem loquitur illa dolens animo:

"O venerande pater, michi nil miserere dolenti,

      Germanam linquis, o venerande pater?

Hic precor, ut maneas, lux ecce diurna recedit,

      Instant iam tenebrae, hic precor, ut maneas."

45

"Ne, soror, ista petas, "frater sanctissimus inquit,

      "Quae petis, haud tribuam, ne, soror, ista petas."

Protinus illa dolens lacrimis rigat ora profusis,

      Dat caput in mensam protinus illa dolens.

Spes erat huic dominus, dominum sic mesta precatur;

50

      Quod vult fit, quoniam spes erat huic dominus.

Tota poli facies operitur nubibus atris,

      Densatur nimbis tota poli facies.

Fulgura crebra micant, collidunt flamina venti,

      Corruat ut celum, fulgura crebra micant.

55

Frater id intuitus, cur egerit increpat illam,

      Nocte domi remanet frater id intuitus.

Postera lux veniens fluctus fugat atque tenebras,

      Pandit iter iusto postera lux vemens.

Transierat triduum post eius ab inde digressum,

60

      Post istud signum transierat triduum.

Suspicit ad speculam celum Benedictus et orat,

      Sic germane animam suspicit ad speculam.

In volucris specie. volitabat ad astra columbae,

      Quid fuit, hac patuit in volucris specie.

65

Quod soror astra petat, grates agit omnipotenti:

      Fratribus enarrat, quod soror astra petat.

Collocat in tumulo parto sibi membra sororis,

      Et sua post ipso collocat in tumulo.

Vnus habet tumulus, tenuit quos una voluntas:

70

      Quos parit una alvus, unus habet tumulus.

Signa stupenda nimis vita fecere fruentes,

      Defuncti faciunt signa stupenda nimis.

Vidimus hic homines ereptos demone plures,

      Insanos sanos vidimus hic homines.

75

Est data pluribus hic vos oris, lux oculorum,

      Firma pedum virtus est data pluribus hic.

Hic deus omnipotens meritis placatur eorum;

      Que petitur, prestat hic dens omnipotens.

Hic et ubique deus precibus nos protegat horum,

80

      Nos regat et foveat hic et ubique deus.

 

2.

O benedicta soror Benedicti, numine Christi

      EximiIque patris, o benedicta soror.

Prompta vacare deo, Scolastica iure vocaris,

      Cerneris a cunis prompta vacare deo.

5

Seria consilio iam tunc virguncula quamvis,

      Calcatrix cosmi, seria consilio.

Sponsa decora dei, niveis tu compta lapillis

      Lilia sacra feres, sponsa decora dei.

Appetis alta poli, tempsisti dulcia secli:

10

      Dindyma perpetui appetis alta poli.

Cuncta perosa tibi Phoebi sub iubare posta,

      Et malesuada soli cuncta perosa tibi.

Castalides proceres praeibas concita praedux,

      Illuminaras ovans Castalides proceres.

15

Virginal ecce tuum fratris coniunxeras edi,

      Staret ut invulsum virginal ecce tuom.

Vnguibus a teneris mutans superna caducis,

      Victoriamque tenens unguibus a teneris.

Ampla trophaea refers aretes spudes meletes te,

20

      Filia virgo Sion, ampla trophaea refers.

Versibus heroicis alias, castissima, laudes

      Scripsimus ecce tibi, versibus heroicis,

Quis liquido patuit meritorum culmine toto

      Perfectam cunctis, quis liquido patuit.

25

Sufficiat precibus germanum vincere votum,

      Invictum cunctis, sufficiat precibus.

Scribere nunc superest natalem volucre penna,

      Scandere quo iussa es, scribere nunc superest.

Virgo beata die subisti limina regni

30

      Mense Numae in decimo, virgo beata, die.

Phoebus in Aquario vicenas iamque quaternas

      Praeripiens partes, Phoebus in Aquario.

Vnguine pneumatico floreis nutrita verendis,

      Cuius odor patuit unguine pneumatico,

35

Sinibus Abraicis vigilum devecta lacertis,

      Permansura sacris sinibus Abraicis,

Virgineisque choris lenta statione locata,

      Laudibus armonicis virgineisque choris,

Organa quo resonant superni numinis odas,

40

      Angelici proceres organa quo resonant,

Pascere nunc liliis milleno flore refertis,

      Tu paradisiacis pascere nunc liliis.

Hic vigeas, valeas, semper venereris, ameris

      Nunc et in aeternum, hic vigeas, valeas.

 

2a.

Dulcis, adesto meis, praeclara Camoena, labellis,

      Permixtisque modis, dulcis, adesto meis,

Promere quo valeam semper sine fine beatam

      Virgineamque decus promere quo valeam.

5

Pneuma columba volat nec non tibi munera spirat,

      Prodiga dona ferens pneuma columba volat.